Sum heilt ung vann Antje Weithaas stórar kappingar og varð kend sum ein framúr virtuosur. Skjótt spældi hon við orkestrum sum Los Angeles Philharmonic, BBC Symphony Orchestra og teimum stóru týsku radioorkestrinum.

Men tað, sum ger hana til ein av teimum størstu violinistunum í okkara tíð, er dýpdin og reinleikin í hennara listaliga úttrykki, umframt hennara stremban eftir fullkominleika.

Við imponerandi nærveru á pallinum og hvøssum sansi fyri frábrigdum skapar hon meistarliga djúpt persónligar tulkingar av stóru meistaraverkunum.

Hon hevur givið 30 innspælingar út, sum fevna um tær týdningarmestu violinkonsertirnar. Antje Weithaas er í dag ein av teimum fremstu violinleikarum, Evropa hevur fostrað.

Violinkonsert – Ludvig van Beethoven
Víðagitna violinkonsertin, ið eisini er einasta violinkonsert, Beethoven skrivaði lidna, var frumframførd í 1806 av violinleikaranum Franz Clement. Frumframførslan eydnaðist ikki væl, og verkið varð ikki spælt aftur fyrr enn í 1844, tá av bert 12 ára gamla talentinum Joseph Joachim, sum spældi verkið saman við London Philharmonic Society undir leiðslu av Felix Mendelssohn. Í dag er violinkonsertin víðagitin og verður spæld um allan heim.

Symfoni nr. 60 – Joseph Haydn
Tónleikurin var upprunaliga skrivaður í 1774 til komediuna Le Distrait (Gloymski maðurin) eftir franska dramatikaran Jean-François Regnard. Í 1775 umskrivaði Haydn tónleikin til sína symfoni nr. 60. Tað, ið millum annað er serstakt við verkinum, er, at tað er í seks satsum, har ein symfoni vanliga hevur fýra satsir.

Sound and Fury – Anna Clyne
Verkið “Sound and Fury” hevur íblástur úr tveimum stórum verkum, Haydn symfoni nr. 60 og Macbeth hjá Shakespeare. Scottish Chamber Orchestra, Auditorium-Orchestre national de Lyon og Hong Kong Sinfonietta bíløgdu verkið í felag, og Scottish Chamber Orchestra frumframførdi verkið í 2019 í Edinburgh. Anna Clyne varð borin í heim í London í 1980. Hon skrivaði sítt fyrsta verk sum sjey ára gomul. Hon hevur lisið tónleik á University of Edinburgh og á Manhattan School of Music.

Dirigentur: Catherine Larsen Maguire (UK)
Solistur: Antje Weithaas (DE)

LONGD
90 min (íroknað steðg)

Norðurlandahusið
Ley. 26. september 2026, kl. 19.30 – KEYP her

Løkshøll
Sun. 27. september kl. 16.00 – KEYP her

Eftir eina nýggjárskonsert, ið var á tremur við føroyskum solistum, heldur symfoniorkestrið fram at samstarva við føroyskar solistar. Á várkonsertini spælir klaverúrmælingurin Aksel Remmel klaverkonsert nr. 2 eftir Sergej Rachmaninov og síðani verk eftir tónaskaldið Eli Tausen á Lava. 

Eli Tausen á Lava
Eli Tausen á Lava er virkin sum tónaskald, klaverspælari og elektroniskur tónleikari. Við masterútbúgving í tónasmíði frá New York University hevur Eli seinastu árini samstarvað við BBC Scottish Symphony Orchestra, Helsingborgs Symfoniorkestur, The Rhythm Method, Aldubáruni og nú eisini Føroya Symfoniorkestri.

Orkesturverkið let me cry gjørdist eitt satt gjøgnumbrot fyri Eli. Verkið varð frumframført í 2024 á Nordic Music Days í Skotlandi. Hetta vakti stóran ans, og fleiri evropeisk orkestur hava síðani sett verkið á skrá.

Føroyskur solistur
Aksel Remmel er klaverleikari og hevur lokið masterútbúgving á Kongaliga Konservatoriinum í Keypmannahavn í 2025 hjá Jens Elvekjær, professara. Aksel vann í 2021 tónleikakappingina Stella Polaris fyri ungar klassiskar tónleikarar, og hann hevur áður framført saman við Føroya Symfoniorkestri. Á várkonsertini spælir Aksel Remmel á fyrsta sinni eina heila klaverkonsert við symfoniorkestri.

Rachmaninov skrivaði klaverkonsert nr. 2 í árunum 1900 og 1901. Eftir eina katastrofala frumframførslu, har Rachmaninov sjálvur spældi klaver, gjørdist klaverkonsertin eftirfylgjandi eitt av mest spældu verkum hansara.

Tjajkovskij 4. symfoni
4. symfoni eftir Tjajkovskij varð skrivað millum 1877-1878. Verkið snýr seg um fatum, sum merkir lagna á latínskum, og er tí eisini kent sum lagnusymfoniin. Verkið varð skrivað, meðan Tjajkovski fór gjøgnum djúpa persónliga kreppu, sum hoyrist aftur í hugtunga og dramatiska tónleikinum. Hóast symfoniin fyrst varð móttikin við blandaðum reaktiónum, so er verkið í dag mett at vera millum týdningarmiklastu verkum eftir tónaskaldið og verður framført kring allan heimin.

Catherine Larsen-Maguire
Catherine er fødd í Manchester og hevur seinastu 30 árini verið búsitandi í Berlin. Hon las tónleik á Cambridge University, í Hannover og á Karajan Akademinum í Berlin.

Eftir tíggju ár sum solofagottistur í Komische Oper Berlin tók Catherine í 2012 avgerð um at fara eftir dirigentdreyminum. Síðani hevur hon staðið á pallinum við framúr góðum orkestrum, eitt nú London Philharmonic, BBC National Orchestra of Wales, Berliner Radiosymfoniorkestri, Orchestre du Capitole de Toulouse og Hong Kong Sinfonietta.

Við brennandi áhuga fyri unga ættarliðnum av tónleikarum hevur hon undirvíst og stjórnað ungdómsorkestrum kring heimin og verið gestaprofessari á Universität der Künste í Berlin.

Føroya Symfoniorkestur hevur gjørt 4-ára samstarvsavtalu við Catherine.

Dirigentur: Catherine Larsen-Maguire (UK)
Solistur: Aksel Remmel (FO)

Norðurlandahusið
Ley. 14. mars 2026 19:30 – KEYP her

Mentanarhúsið Varpið
Sun. 15. mars 2026 16:00 – KEYP her