Føroyskir solistar komandi ár eru Niklas Kallsoy Mouritsen (horn), Andreas Blaasvær (violin), og ungi Mikkjal Davidsen verður solistur til familju- og jólakonsertirnar.

Enska Catherine Larsen-Maguire verður gestadirigentur til várkonsertina 2024. Hon vitjaði eisini symfoniorkestrið í 2021 og hetta samstarvið gekk so mikið væl, at hon kemur aftur á vitjan.

Vit gleða okkum at síggja tykkum til konsertirnar komandi ár.

“Vit hava leingi ynskt at framskunda alt fyrireikingararbeiðið hjá orkestrinum. Hetta bleiv órógvað av koronu, men nú eru vit við at verða á mál, soleiðis at øll skráin fyri komandi ár er klár, og vit kunnu seta atgongumerki til sølu longu nú”, sigur Hans Petur í Brekkunum, stjóri í Føroya Symfoniorkestri.

Hetta er eisini fyrstu ferð orkestrið vitjar í Fuglafirði.

Til heystkonsertina framførir útseting av Norsku Løvu hjá William Heinesen. Tað er Bjarni Restorff, sum í 2007-2008 hevur útsett Norsku Løvu fyri stórt orkestur.

Niklas Kallsoy Mouritsen verður solistur og hann framførir hornkonsert nr. 3 hjá Mozart.

Norska Løva – William Heinesen (1900-1991)

Í 2021 gav Bjarni Restorff út bók við partituri og nótum til verkið Norsku Løvu. Bjarni skrivaði hesa útseting í 2007-2008. Upprunaliga skrivaðu William verkið fyri klaver, meðan Bjarni altíð hevur meint, at verkið hevði verið betur egnað sum orkesturverk.

Bjarni Restorff er føddur í 1955 og hevur í mong ár starvast sum tónleikalærari á Tórshavnar Musikkskúla . Eisini hevur hann staðið á odda fyri Tórshavnar Manskóri í mong ár. Hann hevur m.a. skrivað tónleik til blandað kór og manskór.

Hornkonsert í Eb-dur – Wolfgang Amadeus Mozart (1756-1791)

Mozart, ið var eitt sonevnt undurbarn, var ein av størstu komponistum innan klassikan tónleik.
Hóast hann fór av fold bert 35 ára gamal megnaði hann at avrika eitt stórbart lívsverk í tónleikinum.

Hornkonsertirnar hjá Mozart verða spældar um allan heim. Hann skrivaði tær til sín góða vin Joseph Leutgeb. Hesar konsertir vóru skrivaðar soleiðis, at solisturin veruliga kundi sláa seg leysan og vísa hvussu dugnaligur hann var.

Niklas Kallsoy Mouritsen (1988-)

Niklas fekk bachelor- og masterútbúgving á lærda tónlistaháskúlanum í Keypmannahavn. Eftir loknan lestur fór hann til Schweiz og kom inn á orkesturakademiið hjá Orchestre de la Suisse Romande í Genève.

Niklas hevur starvast sum fríyrkistónleikari í Danmark og Svøríki, men í 2021 gjørdist hann limur í Danmarks Underholdningsorkestur, har hann starvast í dag.

Niklas er eisini limur í blásikvintettini V Coloris. Kvintettin hevur vunnið virðislønir í internationalum tónleikakappingum, m.a. triðju heiðursløn í Carl Nielsen International Chamber Music Competition 2019 og aðru heiðursløn í Bucharest International Music Competition 2019.

Symfoni 104 – Frantz Joseph Haydn (1732-1809)

Eysturíkarin Frantz Joseph Haydn skapti sonatuformin og tí klassisku symfoniina í fýra satsum, sum vit kenna hana í dag.
Han arbeiddi ein stóran part av sínum lívið hjá ríku Eszterházy familjuni, og var hann avskorin frá øðrum tónleikaumhvørvið og ørðum komponistum tá í tíðini. Hann segði sjálvur, at júst tí varð hann tvungin til at verða originalur og bróta upp út nýggjum.

Haydn legði eisini lunnar undir wienerklassismuna og er hann, saman við Mozart og Beethoven, mest týdningarmiklu persónarnir handan wienerklassiska tónleikin.
Haydn skrivaði yvir 100 symfoniir og Føroya Symfoniorkestur symfoni nr. 104, ið upprunaliga varð frumframførd í London 13. apríl 1795.

Symfoni nr. 1 – Sergej Sergejevitj Prokofiev (1891-1953)

Sergej Sergejevitj Prokofjev varð borin í heim í Donetsk. Hann kom inn á konservatorii sum 13 ára gamal og sum 16 ára gaml skrivaði hann sína fyrstu klaversonatu.

Í 1916-1917 skrivaði hann sína fyrstu symfoni, eisini nevnd ”Tann klassiska”. Verkið, ið er eitt av kendastu verkum hjá Prokofiev, bleiv fumframført í Petrograd tann 18. apríl 1918 i Petrograd, Prokofiev stjórnaði salvur orkestrinum.

Dirigentur: Bernhardur Wilkinson
Solistur: Niklas Kallsoy Mouritsen

Keyp atgongumerki her

Árligu jóla- og familjukonsertirnar verða í Norðurlandahúsinum 2. og 3. desember. Tríggjar konsertir eru á skrá, ein leygardag og tvær sunnudag.

Konsertirnar eru eitt samstarv við musikkskúlarnar, og her fáa evnaríkir musikkskúlanæmingar høvi at royna seg í einum stórum orkestri á hægsta stigi.

Ungir tónleikarar

Eins og vanligt hevur verið seinastu árini, eru tað ung evnarík fólk, ið mynda hesar konsertirnar. Solistur hesaferð verður Mikkjal Davidsen. Mikkjal spælir sello, gongur á musikkskúlamiðnámi og er næmingur hjá Jensi Christiani Guttesen. Barna- og ungdómskórið, Stella, úr Tórshavnar Musikkskúla framførir nakrar jólasangir. Sangararnir eru í aldrinum 10-16 ár. Kórleiðarar eru Edith Dahl Jacobsen og Joanna Johansen.

Konsertskráin er á tremur við alskins musikalskum jólagóðgæti og Eva á Rógvu fer at leiða tykkum gjøgnum konsertina.

Vælkomin á jólakonsert!

Solistur: Mikkjal Davidsen (sello)
Dirigentur: Bernhardur Wilkinson
Frásøgufólk: Eva á Rógvu

https://kvf.fo/sending/var-og-jubilaeumskonsert-hja-foroya-symfoniorkestur?sid=155170

Prát við stjóran í Føroya Symfoniorkestri í Vikuskiftissendingini

https://kvf.fo/netvarp/uv/2021/01/08/nggjrskonsertin-hj-fso-veruleiki-leygarkvldi

Aftur í ár fara umleið 4000 børn at lurta eftir góðum tónleiki og lurta etir søgu.

Kendi danski klaverleikarin, skemtarin og sjónvarpsverturin Sigurd Barrett spælir barnakonsertir saman við Føroya Symfoniokestri í døgunum 15.-19. apríl 2023. Almennar konsertir verða í ávikavist Løkshøll og í Norðurlandahúsinum. Harafturat verða níggju konsertir spældar fyri barnagørðum og skúlum.

Vit kenna øll Sigurd frá barnabókunum og sjónvarpssendingum, serliga barnasendingum. Hann hevur vunnið stóran heiður, og hevur fingið nógvar viðurkenningar fyri sítt arbeiðið millum annað ”Danmarks Radios Symfoniorkesters ærespris”, ”Den folkelige sangs pris” og ”Årets Børnebog”.

Saman við symfoniorkestrinum fer Sigurd at syngja og spæla kendar sangir, og fortelja nýggju søguna um ”Verðins besta ljóðføri. Søguna skrivaði hann tá hann var og ferðaðist í Føroyum, og Súsanna Tórgarð hevur týdd søguna til føroyskt.

Sigurd og symfoniorkestrið gleða seg til eina fantastiska løtu saman við teimum yngstu.

Bernhardur Wilkinsson stjórnar orkestrinum.

10 føroyingar, ið spældu við til fyrstu konsertina hjá Symfoniorestirnum eru enn aktivir nú orkestrið og pallurin hjá orkestrinum, Norðurlandahúsið, fylla 40 ár.

Hin 19. juni í 1983 spældi Føroya Symfoniorkestur sína fyrstu konsert í spildurnýggja Norðurlandahúsinum. 40 ár seinni kunnu vit hyggja aftur á eina tónleikaliga menning íborin av visiónum, ágrýtni og hørðum arbeiði. Konsertin er ein felags 40-ára jubilæumskonsert hjá bæði Norðurlandahúsi og Føroya Symfoniorkestri.

Í samband við hátíðarhaldið hevur orkestrið bílagt symfoni í fýra satsum fyri orkestur og kór frá tónaskaldinum Tróndi Bogasyni. Sostatt fáa áhoyarar eisini høvi at hoyra kórið hjá symfoniorkestrinum. Hetta er fyrsta symfoniin Tróndur hevur skrivað.

Symfoniorkestrið fær eisini vitjan av altjóða viðurkendu Franceska Dego. Hon fer at framføra Brahms violinkonsert.

Sirið Stenberg, landstýrskvinna í mentamálum bjóðar vælkomin, og eftir steðgin fer Ólavur Jakobsen at práta við tónaskaldið Trónd Bogason.

Bernhardur Wilkinsson stjórnar orkestrinum og Tóra Vestergaard venur kórið.